Preto de 1.000 estudantes descobren o mundo da ópera na Coruña
A ópera está a achegarse á mocidade coruñesa grazas ao programa "Ópera para nenos", promovido pola Asociación de Amigos da Ópera da Coruña. Esta mañá celebrouse no auditorio de Afundación a primeira sesión da tempada, na que participaron estudantes de primaria de distintos centros públicos de A Coruña e da súa comarca. En total, preto de 1.000 alumnos de 3º a 6º de primaria participarán nas actividades programadas entre hoxe e mañá, nunha experiencia educativa que busca achegarlles o mundo da ópera dunha forma dinámica e divertida.
Durante unha hora, o alumnado realiza unha viaxe musical por distintos países como China, Francia, Italia e España, a través de fragmentos de óperas como Carmen ou L'elisir d'amore, interpretados polo equipo de Ópera Kids. Esta masterclass adaptada ás diferentes idades non só lles permite escoitar as pezas, senón tamén participar activamente con animacións e cancións, facendo que a ópera sexa máis próxima e accesible.
Este proxecto, que chega á súa terceira edición na cidade, conta co apoio da Deputación da Coruña, do INAEM, da Fundación Emalcsa e coa colaboración da Xunta de Galicia, que se encarga de coordinar a participación dos centros educativos. O obxectivo principal é achegar a ópera a todos os públicos, especialmente aos máis novos, como unha parte fundamental da oferta cultural inclusiva e enriquecedora da cidade.
A delegada da Xunta, Belén do Campo, acompañada polo director territorial da Consellería de Educación, Ciencia , Universidades e Formación Profesional, por Indalecio Cabana, participou na actividade didáctica. A delegada da Xunta subliñou a importancia de incorporar a lírica na educación porque “axuda ás mozas e mozos a desenvolver unha maior sensibilidade estética e emocional, permitíndolles interpretar o mundo desde diferentes perspectivas”. Ademais, engadiu, “é esencial que desde as institucións educativas e culturais se impulsen iniciativas que acheguen a lírica ás novas xeracións, mediante actividades dinámicas que esperten a súa curiosidade pola música teatral”.
A programación continúa con Marko Mimica
A axenda cultural desta semana continúa mañá cunha dobre sesión de "Ópera para nenos" e, pola tarde, co esperado recital do baixo-barítono Marko Mimica, quen actuará por primeira vez en Galicia. O concerto, titulado Long time ago, celebrarase ás 20:00 horas no Teatro Rosalía de Castro, e as entradas están dispoñibles en ataquilla.com.
Semana especial da ópera
Coincidindo co Día Mundial da Ópera, que terá lugar este venres 25 de outubro, a semana completarase con máis actividades. O xoves, ás 19:00 horas, celebrarase a presentación do libro Historia de la Zarzuela en viñetas, escrito por Manuel Rajal, na sala de prensa de Afundación. A entrada será libre ata completar aforo.
Para pechar esta semana dedicada á lírica, o venres 25 de outubro terá lugar un concerto especial protagonizado pola soprano Belén Vaquero, ás 19:00 horas no Centro Cívico de Labañou. O acceso será libre ata completar aforo, poñendo así o broche final a unha semana na que a ópera e a música lírica toman o protagonismo na Coruña.