Premian os mellores traballos académicos sobre turismo no V Congreso SOCANTUR
A Coruña acolleu o acto de clausura do V Congreso Internacional de Socioloxía e Antropoloxía do Turismo (SOCANTUR), no que se entregaron os premios aos mellores traballos de fin de mestrado (TFM) e teses de doutoramento realizados sobre turismo desde unha perspectiva sociolóxica e antropolóxica.
O primeiro premio á mellor tese de doutoramento foi para Ana Leiras Gómez, da Universidade da Coruña (UDC), pola súa investigación titulada 'Análise da imaxe proxectada e percibida dos destinos turísticos accesibles na era dixital'.
No caso dos traballos de fin de mestrado, o galardón foi para Aurora Ximena Zuloaga Sánchez, da Universidad de Guadalajara, polo seu traballo 'A vida despois do traballo. Os efectos da precariedade laboral na vida cotiá dos traballadores de turismo en Puerto Vallarta, Jalisco'.
Tamén se outorgaron dúas mencións honoríficas. A tese de doutoramento de Sergio Muiño Freire, da Universidade de Santiago de Compostela (USC), recibiu unha mención polo seu traballo 'Turismo e desenvolvemento local en Santo André de Teixido'. Pola súa parte, Lorena Márquez González, da Universidad de La Laguna, obtivo outra mención polo seu TFM 'Os discursos turísticos sobre o pasado e a súa incorporación á cultura e identidade. O caso das Pirámides de Güímar (Tenerife)'.
SOCANTUR converteuse nestes días nun espazo de encontro para expertos en socioloxía, antropoloxía e profesionais doutras disciplinas que traballan nos eidos académico, institucional, empresarial ou da sociedade civil organizada. Esta quinta edición estivo centrada na análise interdisciplinaria dos impactos socioculturais, políticos e económicos do sector, así como nos retos globais actuais, como a transición ecolóxica, a soberanía alimentaria, a descarbonización da economía ou as desigualdades sociais e de xénero, co obxectivo de fomentar modelos de xestión turística responsables e sostibles.
O acto de clausura contou coa presenza de representantes do Concello da Coruña, do comité organizador e dun numeroso grupo de docentes das facultades de Socioloxía e Turismo da Universidade da Coruña.