Sucesos

O Concello solicita á cidadanía que avise á Policía Local se detecta movementos sospeitosos nas inmediacións das farolas municipais, tras varios furtos rexistrados nos últimos días

O Concello de Oleiros fixo un chamamento á colaboración cidadá tras rexistrarse nos últimos días diversos roubos de cable de cobre pertencente ao alumeado público municipal. A administración local pide á veciñanza que contacte coa Policía Local, no teléfono 981610001, no caso de observar a algunha persoa actuando de maneira sospeitosa nas proximidades das farolas.

Segundo informou o goberno local, tanto a Policía Local como a Garda Civil teñen xa aberta unha investigación para tratar de identificar os responsables destes feitos, que afectan directamente ao patrimonio público e provocan importantes prexuízos no funcionamento dos servizos municipais.

Desde o Concello subliñan que a colaboración da cidadanía pode resultar determinante para localizar aos autores destes roubos e evitar que se repitan novos episodios. O obxectivo é reforzar a vixilancia ante unha situación que, ademais do dano económico, pode ocasionar incidencias na iluminación das rúas.

A reposición do cableado subtraído supón, segundo advirte o executivo local, un custo relevante para as arcas municipais, o que obriga a destinar recursos a reparar estes danos en lugar de empregalos noutras actuacións previstas. Mentres se realizan as intervencións necesarias, o Concello avisa de que poden producirse problemas puntuais no alumeado de distintas vías do municipio.