Pena Furada pecha en Coirós a II mostra de teatro para persoas adultas con ‘Rosalía, a filla do mar’
O Concello de Coirós continúa a aposta pola programación cultural para público adulto coa II mostra de teatro, que este mes entra na súa recta final. O cuarto e último espectáculo do ciclo estará protagonizado polo grupo de teatro local ‘Pena Furada’, que subirá ao escenario a obra ‘Rosalía, a filla do mar’. A representación terá lugar o domingo 30 de novembro ás 18.00 horas, e será de balde ata completar aforo.
A proposta busca achegar ao público a figura de Rosalía de Castro, poeta e narradora fundamental da literatura galega e autora dunha obra que abriu camiño á modernidade cultural do país. ‘A filla do mar’ inspira o título da montaxe e remite á primeira novela da escritora, publicada en 1859, na que Rosalía afonda en temas como a condición das mulleres, a inxustiza social e a dureza da vida nas comunidades mariñeiras.
Desde o Concello salientan que a II mostra de teatro para persoas adultas pretende consolidarse como un espazo estable para o teatro afeccionado e profesional, ofrecendo durante varias semanas diferentes propostas escénicas e reforzando o papel de Coirós como referente cultural na comarca de Betanzos.
A participación do grupo local ‘Pena Furada’ supón, ademais, un recoñecemento ao traballo continuado das veciñas e veciños que manteñen vivo o teatro de base no municipio.
O acceso será libre ata completar a capacidade do recinto, polo que se recomenda chegar con antelación para garantir praza. A organización lembra que a mostra está dirixida a público adulto, pero aberta a todas aquelas persoas interesadas en redescubrir a figura de Rosalía de Castro a través do teatro.