Paula Otero, do CN Arteixo, elixida mellor nadadora galega de 2025 nos Premios Galicia Sport
Paula Otero, nadadora do Club Natación Arteixo, vén de ser recoñecida como mellor nadadora de 2025 na VI edición dos Premios Galicia Sport. A deportista impúxose na votación popular con 403 votos (68 por cento), por diante de Carla Carrón, que sumou 194 apoios (32 por cento).
O galardón chega despois dun ano no que Otero reforzou o seu papel como un dos nomes propios da natación galega. En 2025 proclamouse subcampioa de Europa na proba de 3 quilómetros ‘knockout’ no Europeo de augas abertas, un salto de nivel que a situou entre a elite continental.
En paralelo, a nadadora tamén foi noticia polos seus rexistros en piscina, onde acadou a mínima para o Europeo de piscina curta de Lublin 2025 nos 1.500 libre cun tempo de 16.05.39, un resultado que volveu poñer o foco no traballo do CN Arteixo como viveiro de talento.
Nacida en Barcelona e criada na Coruña, Otero consolidou nos últimos anos unha traxectoria ascendente, combinando competicións de fondo en piscina e o alto rendemento en augas abertas, e converténdose nunha das deportistas con maior proxección do panorama galego.