Pantomima Full presentará o seu novo espectáculo ‘Hecho a mano’ no Teatro Colón o vindeiro 7 de decembro
Rober Bodegas e Alberto Casado, ou o que é o mesmo, Pantomima Full, actuarán na Coruña co seu novo espectáculo: ‘Hecho a mano’, un show onde prometen seguir polo mesmo camiño que lles levou ao éxito cos seus dous anteriores espectáculos en directo. A cita será o próximo 7 de decembro no Teatro Colón ás 20.30 horas. As entradas xa están á venda a través de Ataquilla.
‘Hecho a mano’ é un show onde Pantomima Full promete seguir exactamente o camiño que lles levou ao éxito cos seus anteriores shows. Hora e media de monólogos sobre os temas dos seus vídeos e pezas cómicas cos seus personaxes. A fórmula do éxito que soamente se pode defender sendo uns dos mellores humoristas deste país. O Goberno de Inés Rey mantén a súa aposta pola comedia dentro da programación cultural da cidade, que é xa un referente grazas a eventos como o EMHU.
Rober Bodegas e Alberto Casado forman xuntos Pantomima Full. Son un dúo cómico que interpreta arquetipos sutís e “tronchantes” en vídeos curtos, masivamente compartidos en redes sociais. Teñen o superpoder de sintetizar calquera aspecto da sociedade en 50 segundos. As súas parodias son moi reais, tiran de estereotipos e xogan coa pose. Rin das traxedias da súa xeración cun humor moi seu: absurdo, áxil, directo e breve. As súas pezas cómicas non só están a triunfar na Internet, senón que tamén enchen as mellores salas e teatros do país.