Paderne reinicia o servizo de Podoloxía gratuíta con 222 persoas inscritas tras as vacacións de verán
O Concello de Paderne reanudou a mediados de agosto o servizo de Podoloxía gratuíta, un dos máis demandados no marco do programa de Servizos Sociais do actual equipo de goberno. Coa incorporación deste servizo, xa son 222 as persoas inscritas, e o formulario segue aberto para aquelas persoas maiores de 60 anos que non realicen actividade laboral, así como para persoas con discapacidade ou en situación de vulnerabilidade socioeconómica.
O alcalde, Sergio Platas, destaca que "para consolidarnos como un Concello con valores e orgullo de pertenza debemos implicarnos no día a día da xente e mellorar a súa calidade de vida. Nese sentido actúa este servizo". A Podoloxía, xunto co préstamo de equipamento técnico asistencial, forma parte dun completo programa destinado a mellorar a vida dos veciños e veciñas de máis idade, así como daqueles con necesidades especiais.
O servizo, que foi ofrecido de setembro a decembro de 2023 e posteriormente de abril a xuño de 2024, volve agora tras un breve período de vacacións de verán para atender a alta demanda. As consultas realizan nunha sala habilitada na Casa Consistorial os luns e martes pola mañá e os mércores pola tarde. Ademais, se o usuario presenta problemas de mobilidade, a asistencia pode ser prestada no seu domicilio.
Marisa Abrodos, concelleira de Servizos Sociais, indica que "a Podoloxía únese ao préstamo de equipamento técnico asistencial e á adquisición de novo material para cesión gratuíta, ademais de ás diversas iniciativas que levamos a cabo ao longo do ano para asistir ás nosas persoas maiores e ás persoas con necesidades especiais".