Paderne ofrece un curso de dixitalización para persoas maiores no Fogar do Maior
O Concello de Paderne porá en marcha no mes de decembro un curso de dixitalización dirixido ás persoas maiores do municipio, co obxectivo de axudarlles a usar con máis seguridade e autonomía as novas tecnoloxías nas súas xestións cotiás. A actividade desenvolverase no Fogar do Maior (Casa do Concello) os días 4, 10 e 11 de decembro, entre as 10.00 e as 13.00 horas.
A iniciativa, que leva por lema 'Mellor acompañad@', enmárcase no programa de promoción do uso das TIC entre as persoas maiores e conta coa colaboración da Fundación Amigos de Galicia e da Consellería de Política Social e Igualdade da Xunta de Galicia.
Durante as sesións abordaranse cuestións prácticas como o uso do caixeiro automático, a realización doutros trámites habituais en máquinas de quendas, o manexo básico do teléfono móbil ou smartphone e o funcionamento da aplicación móbil do Sergas e da Chave 365, ferramentas cada vez máis necesarias para pedir cita médica ou facer xestións coa administración.
As persoas interesadas poden inscribirse xa nos Servizos Sociais do Concello, de maneira presencial, ou chamando ao teléfono 981 797 001. Desde o goberno local fan un chamamento ás familias para que animen aos seus maiores a participar neste curso, pensado para resolver dúbidas paso a paso e fomentar unha vida diaria máis autónoma e conectada.