Paderne esixe solucións no Centro de Saúde: cubrir vacantes e axilizar listas de espera
O goberno local moveu ficha ante as queixas veciñais pola situación do Centro de Saúde e solicitou unha reunión co Xefe de Servizo de Miño, Francisco Freixeiro, e coa coordinadora de Enfermaría de Atención Primaria de Paderne, Carmen Rodríguez-Tubío. A iniciativa do alcalde, Sergio Platas, responde ás numerosas preocupacións trasladadas por persoas usuarias sobre a falta de recursos e persoal que está a afectar á atención sanitaria do municipio.
Entre os asuntos prioritarios que se abordaron na xuntanza figuran a cobertura das prazas vacantes, a redución das listas de agarda e a estabilización do cadro de persoal. Estes tres eixos concentran a maior inquietude cidadá, segundo resaltou o rexedor, que subliñou que “trátase dun servizo moi sensible, no que está en xogo o benestar da nosa xente” e que por iso esixe respostas urxentes e coordinadas coas áreas sanitarias competentes.
O Concello reclama medidas concretas e calendarios de actuación para garantir unha atención primaria axeitada: prazas cubertas de forma estable, mecanismos para aumentar a capacidade de cita e rápidas melloras organizativas que desconxestionen a demanda. O consistorio avanza que fará un seguimento estreito das respostas recibidas e manterá informada á veciñanza das medidas acordadas, ao tempo que pide colaboración entre administracións para que as solucións sexan efectivas e duradeiras.