Oza-Cesuras vivirá unha tarde de diversión solidaria con bingo, mercadillo e doces
O Concello de Oza-Cesuras acollerá este xoves 30 de maio unha actividade moi especial pensada para todas as idades. A partir das 16.30 horas, o pavillón de Oza converterase nun espazo de encontro lúdico coa celebración dunha tarde de bingo e mercadillo organizada polo CEIP Oza dos Ríos.
O evento, cun marcado carácter solidario, ten como obxectivo recadar fondos para a excursión de fin de curso do alumnado de 6º de Primaria. Para iso, os propios estudantes prepararon un mercadillo con produtos elaborados por eles mesmos: pulseiras, chaveiros, colares, portavelas e moito máis.
A xornada incluirá tamén un animado sorteo de premios a través do tradicional bingo, que promete emoción e moitas risas entre os asistentes. Ademais, non faltarán os doces: haberá chocolate con churros e algodón de azucre para que grandes e pequenos poidan endulzar a tarde.
Desde o colexio animan a toda a comunidade educativa e veciñanza a achegarse ao pavillón para gozar dunha tarde diferente, en familia e colaborando cunha boa causa. Sen dúbida, unha oportunidade perfecta para compartir, divertirse e apoiar aos máis pequenos nun momento tan especial do curso.