Eventos

A compañía Educateatro representará a obra o 24 de xaneiro ás 18.00 horas, nunha versión do conto con bonecos a tamaño real e pensada para familias con crianzas a partir de 2 anos

O Concello de Oleiros programa para este sábado 24 de xaneiro o musical infantil ‘Os tres porquiños’, da compañía Educateatro, unha proposta pensada para público familiar que se poderá ver no Auditorio Gabriel García Márquez a partir das 18.00 horas.

O espectáculo ofrece unha revisión do conto tradicional adaptada ao teatro musical. A historia está conducida por dous exploradores que se internan no bosque coa intención de coñecer en persoa aos seus personaxes favoritos, nunha montaxe que aposta polo xogo escénico e pola participación emocional do público máis novo.

Un dos elementos máis chamativos da función é o uso de bonecos a tamaño real, concibidos para captar a atención das crianzas e ofrecer unha experiencia visual especialmente impactante. A actividade está dirixida a familias con nenos e nenas maiores de 2 anos.

As inscricións e a reserva de prazas están abertas e permanecerán dispoñíbeis ata completar a capacidade do auditorio. Para máis detalles sobre o proceso de reserva, o Concello remite á súa web oficial.