Os Reis Magos visitarán Vilarmaior este domingo cunha recepción para a cativada
O Concello de Vilarmaior ultima os preparativos para recibir este domingo, 4 de xaneiro, a visita de Melchor, Gaspar e Baltasar, unha das xornadas máis agardadas polas familias nestas datas de Nadal. O encontro terá lugar no pavillón polideportivo e está previsto que comece ás 16.30 h.
Os Reis Magos recibirán ás nenas e nenos, escoitarán as súas ilusións e recollerán as cartas cos encargos e desexos de cada quen, nun acto pensado para manter viva a tradición e facer da tarde unha experiencia especial para a cativada.
Ademais da recepción, os Reis Magos repartirán agasallos e caramelos, convertendo a cita nunha celebración familiar e participativa, na que tamén se anima á veciñanza a achegarse con tempo para facilitar o desenvolvemento da actividade. A convocatoria pretende, así, ofrecer unha alternativa de lecer no propio municipio e reforzar o ambiente festivo previo á noite máis máxica do ano.