Os mozos senegaleses Ibrahima Diack e Magatte Ndiaye, Fillos Adoptivos da cidade da Coruña
Ibrahima Diack e Magatte Ndiaye, os mozos senegaleses que arriscaron a súa vida cando tentaron salvar a de Samuel Luiz, son recoñecidos como Fillos Adoptivos da cidade da Coruña. Así se fixo oficial nunha cerimonia para entregar o título da man da alcaldesa do Concello da Coruña, Inés Rey. O acto contou coa presenza doutras autoridades, como a delegada da Xunta, Belén do Campo, o delegado do Goberno en Galicia, Pedro Blanco, e a subdelegada do Goberno na Coruña, María Rivas.
O delegado, Pedro Blanco, destacou a valentía dos homenaxeados que “non dubidaron en socorrer ao coruñés aínda arriscando a súa vida”. Ibrahima e Magatte serán os únicos africanos en formar parte deste listado, que comezou no ano 1868 e conta, na actualidade ,cun total de 44 nomes. Os senegaleses foron recoñecidos como fillos adoptivos no ano 2021 pero, eles mesmos, solicitaron retrasar o nomeamento ata despois da sentencia do crime.
O acto, celebrado esta tarde no Palacio Municipal de María Pita, foi convocado para honrar a memoria de Samuel Luiz e para destacar o exemplo de solidariedade e valores manifestados por Diack e N’Diaye, que acudiron en axuda da vítima. Durante a súa intervención, a rexedora enfatizou a importancia de distinguir entre “a falsa valentía do agresor e a honrosa valentía do solidario”, lembrando que “A Coruña amosou en moitísimas ocasións ser unha cidade valente”. Ademais, Rey subliñou que “non ten cabida a violencia nin a homofobia na nosa sociedade”, recordando un caso que consternou ao país enteiro pola súa crueldade:
“Daquel inferno que aínda nos doe como cidade xurdiron dúas figuras admirables, que aquí estamos a homenaxear. Durante a malleira mortal, só un par de persoas acudiron en axuda da vítima. Foron, ademais, os que máis tiñan que perder con esa actuación. Pero non dubidaron en xogarse o corpo. Foron os senegaleses Ibrahima Diack e Magatte N’Diaye, que exhibiron a valentía da solidariedade, presentáronse na axuda de Samuel, mesmo recibindo algún golpe, e ademais intentaron auxilialo cando xa estaba no chan”, recordou a alcaldesa.
O título de Fillos Adoptivos é un símbolo de gratitude e admiración cara a aqueles que, en situacións límite, demostran un espírito altruísta e un coraxe exemplar. Este homenaxe recórdanos que, mesmo nas circunstancias máis adversas, a valentía e a entrega desinteresada son o motor dunha sociedade máis xusta e humana.