Os irmáns Sánchez Bouzas de Ordes proclámanse campións galegos de Rallymix
Os irmáns Jesús e Manuel Sánchez Bouzas, veciños de Ordes, proclamáronse campións galegos de Rallymix na Agrupación 2 e na Copa Pirelli Galicia despois dunha intensa tempada composta por sete probas disputadas en distintos puntos de Galicia. Jesús Sánchez Bouzas, como piloto, e Manuel Sánchez Bouzas, como copiloto, lograron este importante título tras unha final decisiva en Barbadás (Ourense).
A última carreira da tempada, celebrada en condicións meteorolóxicas adversas o sábado, foi especialmente desafiante. Coas estradas esvaradías debido á chuvia, os irmáns Sánchez Bouzas lograron colocarse en cabeza tanto na súa categoría como na Copa Pirelli, mantendo a vantaxe nunha clasificación moi competida. O domingo, co tempo mellorado, o equipo continuou demostrando a súa precisión e habilidade, consolidando a súa posición ata asegurarse ambos títulos.
Este triunfo é froito do traballo constante dos irmáns Sánchez Bouzas e do apoio recibido ao longo da tempada. Os campións quixeron agradecer a todas as persoas e entidades que colaboraron no seu camiño, sen as cales este logro non tería sido posible.