Os coches clásicos toman as rúas este domingo na II KDD Ruta Clásicos
O son dos motores de sempre volverá escoitarse no Concello de Curtis este domingo, 1 de marzo, coa celebración da II KDD Ruta Clásicos, unha concentración de vehículos clásicos e deportivos que inclúe ruta e paradas abertas ao público para ver os coches de preto.
A organización, Clásicos Coruña (KDD Clásicos Coruña Y+), programou a xornada con varias paradas para que veciñanza e afeccionados poidan achegarse a sacar fotos e compartir a paixón polo motor. Segundo o horario difundido, a primeira exposición será de 10.30 a 12.30 horas na Praza de España de Teixeiro. Despois, a caravana desprazarase ata a Praza da Feira de Curtís, onde permanecerá de 12.30 a 14.00 horas. Pola tarde, os vehículos regresarán a Teixeiro para unha segunda sesión na Praza de España, de 16.30 a 19.30 horas.
O punto de encontro elixido, a Praza de España de Teixeiro, é un dos espazos máis centrais da localidade, diante do Concello e habitual escenario de citas con tradición, como a feira periódica que se celebra no núcleo.