Os clubs de Miño levan aos campos a mensaxe do 25N cos petos contra a violencia machista
O Concello de Miño continúa estes días coa súa programación arredor do 25N, Día Internacional para a Eliminación da Violencia contra as Mulleres, utilizando o deporte como altavoz da igualdade. No marco destas accións, a concelleira de Igualdade, Catalina Morado, e o concelleiro de Deportes, José Manuel Pantín Morado, fixeron entrega á AD Miño do resto dos chamados petos contra a violencia de xénero, completando así o reparto iniciado días atrás.
En total son 280 petos que levan a mensaxe de rexeitamento da violencia machista aos terreos de xogo, tanto en adestramentos como en partidos oficiais. Parte deste material xa fora distribuído ao club Alameda Xario FS, e agora é a AD Miño a que incorpora esta peza de equipamento ás súas equipacións, reforzando a visibilidade da campaña nas categorías de base.
Desde o goberno local salientan que a iniciativa busca implicar especialmente a infancia e a mocidade, transmitindo a través do fútbol valores de respecto, igualdade e tolerancia cero fronte ás violencias machistas. O Concello e os clubs do municipio unen así forzas neste 25N para lanzar unha mensaxe conxunta de NON á violencia de xénero e para consolidar Miño como un concello comprometido coa igualdade real entre mulleres e homes.