Os centros municipais de empresas de Agrela e o Papagaio ofrecerán seis meses de estancia de balde a novos emprendedores
O Concello da Coruña dará un novo pulo ao emprendemento coa modificación da ordenanza que regula os prezos dos centros municipais de empresas de Agrela e o Papagaio. A proposta, que se levará a pleno a vindeira semana, permitirá que as persoas emprendedoras dispoñan de seis meses de estadía sen custo ningún nestes espazos de apoio á actividade empresarial.
A medida enmárcase nas novas modalidades implantadas recentemente, que diferencian entre preincubación, incubación e consolidación. Grazas a esta flexibilización, xa máis de media ducia de proxectos se incorporaron aos centros municipais nos últimos meses. A concelleira de Emprego, Comercio e Mercados, Diana Cabanas, explicou que o obxectivo é 'facilitar o inicio da actividade e adaptar os recursos ás necesidades reais de cada proxecto, ofrecendo acompañamento e asesoramento específico segundo a súa fase de desenvolvemento'.
Unha vez superado o período gratuíto, as persoas usuarias pasarán a aboar entre 81 e 169 euros mensuais, en función das características do local. Tras a aprobación inicial da modificación, abrirase un prazo de trinta días hábiles para consultar o texto no Boletín Oficial da Provincia, momento no que tamén se poderán presentar suxestións ou achegas.
Con esta iniciativa, o Concello busca favorecer a consolidación de novas empresas e reforzar a rede de apoio ao tecido emprendedor da cidade, facilitando espazos accesibles e dotados de servizos básicos a prezos reducidos.