Os campus de Elviña e A Zapateira decláranse sen fume para frear tabaco e vapeo
Os campus de Elviña e A Zapateira súmanse desde este luns á rede de Espazos Sen Fume impulsada pola Asociación Española Contra o Cancro en colaboración coa Universidade da Coruña (UDC). A iniciativa busca crear contornas libres de tabaco, vapeo e outras formas de consumo para desnormalizar estes hábitos, protexer a saúde e reducir a exposición involuntaria ao fume.
A declaración formalizouse nun acto institucional celebrado na Casa do Estudantado, no que participaron o reitor da UDC, Ricardo Cao; o vicepresidente provincial da Asociación, Carlos Lamora; a vicerreitora do Campus de Ferrol e Responsabilidade Social, Ana Isabel Ares; e o director de UDC Saudable, Sergio Santos. Durante o encontro deuse lectura á declaración institucional coa que a universidade reforza o seu compromiso con campus máis saudables, declarando edificios, instalacións deportivas e accesos inmediatos como espazos libres de fume e intensificando as accións de sensibilización e prevención.
Tras o acto, os asistentes percorreron os campus para coñecer a sinalización instalada e, a continuación, celebrouse unha xornada informativa sobre a implantación destes espazos no salón de actos da Facultade de Ciencias.
Desde a Asociación, Lamora subliñou que ‘fumar é o maior factor de risco en cancro e a causa principal de morte evitable no mundo’, polo que considera que medidas deste tipo son ‘valiosas’ para avanzar cara contornas máis saudables. Pola súa banda, Cao enmarcou a iniciativa no traballo de UDC Saudable e destacou que se trata dun paso para construír espazos máis amables, promover hábitos de vida san e reforzar o compromiso da institución cos Obxectivos de Desenvolvemento Sostible.
Con esta incorporación complétase a integración de todos os campus da UDC nos Espazos Sen Fume: o primeiro en adherirse foi o de Ferrol en maio de 2025 e, xa en outubro, sumáronse o Reitorado e os campus de Oza, Riazor e Bastiagueiro.
A rede medra tamén a nivel provincial. Coa adhesión de Elviña e A Zapateira, a Asociación cifra en 74 os Espazos Sen Fume activos na provincia da Coruña, 35 deles en colaboración coa UDC. O obxectivo é estender contornas libres de tabaco a espazos educativos, praias, parques e outros ámbitos de uso público.
A entidade lembra que o tabaco está detrás dunha parte moi relevante da carga oncolóxica: é responsable de un de cada tres casos de cancro e relaciónase con ata 16 tipos distintos. Asemade, advirte da especial vulnerabilidade da mocidade: o 80% das persoas fumadoras comezan antes dos 18 anos e, en España, máis da metade da poboación de 14 a 18 anos (54,6%) probou os cigarros electrónicos, un consumo que pode actuar como porta de entrada ao tabaquismo.