Os barrios de Matogrande e Xuxán acollerán a máis de 1.700 inscritos no circuíto Coruña Corre
Os barrios de Matogrande e Xuxán están á espera da segunda carreira popular desta tempada do circuíto Coruña Corre, que arrincará este domingo 6, con máis de 1.700 inscritos confirmados tras o peche das inscricións.
O concelleiro de Deportes, Manuel Vázquez, destacou a relevancia do Coruña Corre no calendario deportivo anual da cidade, afirmando que "é un programa fundamental para promover os hábitos de vida saudables entre persoas de todas as idades e estamos a ver como estas boas prácticas pasan de xeración en xeración". Vázquez tamén resaltou as probas en categorías inferiores –sub-18, sub-16, sub-14, sub-12, sub-10 e peques–, que axudan a crear unha "canteira de cara ao futuro".
Ademais, o edil subliñou que unha das prioridades desta edición é potenciar e mellorar a experiencia dos participantes, xa sexa en carreiras individuais ou no conxunto da tempada. "Queremos estar máis preto das e dos deportistas, contando co seu feedback para dar un paso máis no pulo ao Coruña Corre", sinalou Vázquez.
Unha das grandes novidades desta carreira popular é a incorporación dun novo patrocinador: Cuatro Caminos Centro Comercial. Este sábado 5, o patrocinador acollerá a entrega de dorsais nas súas instalacións, onde as persoas inscritas que necesiten recoller o seu dorsal poderán facelo de 11.00 a 20.30 horas, de forma ininterrompida.
Ademais, os dorsais tamén se poderán recoller o domingo 6, o mesmo día da carreira, no colexio Liceo La Paz, a partir das 9:00 horas ata unha hora antes do comezo de cada unha das probas.
A xornada en Matogrande-Xuxán comezará ás 10.00 horas na contorna da gran praza central de Xuxán, onde se arrincará a carreira en categoría absoluta, seguida polas probas en categorías de base. Con esta iniciativa, o circuíto Coruña Corre reafirma o seu compromiso co fomento do deporte e a promoción de estilos de vida saudables na comunidade.