Ordes remata as obras de mellora enerxética no polideportivo do CEIP Campomaior
O Concello de Ordes vén de confirmar a finalización das obras de mellora da eficiencia térmica no polideportivo do CEIP Campomaior, unha intervención orientada a reducir perdas de calor, mellorar o confort interior e avanzar cara a un uso máis sostible das instalacións educativas. O investimento total ascendeu a 68.446,77 euros, dos cales 60.000 euros foron achegados pola Xunta de Galicia.
Entre as actuacións realizadas inclúese a substitución das antigas fachadas de chapa simple por paneis sándwich de aceiro, que ofrecen maior illamento; o revestimento interior perimetral con pranchas de la de madeira, que contribúen á estabilidade térmica e acústica; e a incorporación de aireadores na cuberta, co obxectivo de mellorar a ventilación natural e manter condicións máis confortables no interior do recinto deportivo.
Segundo o Concello, estas melloras supoñen un salto cualitativo nas condicións de uso do polideportivo, reducindo a demanda enerxética e facendo o espazo máis agradable tanto para o alumnado como para o profesorado e resto da comunidade educativa do CEIP Campomaior. O executivo municipal destaca que se trata dunha aposta pola eficiencia, pola sostibilidade e polo benestar en centros de ensino públicos.