Ordes prepara na Alameda o derradeiro brinde do ano con campanadas infantís ás 17.00 horas
Ordes despedirá o ano cunha gran festa na Alameda municipal, unha proposta que nace a petición da propia veciñanza, que reclamaba converter a última tarde do ano nun momento especial para compartir en familia e entre amigos. Co lema 'Para o derradeiro brinde do ano', o Concello anima a todos os residentes e visitantes a achegarse a este encontro festivo.
A celebración desenvolverase en horario de 13.00 a 19.00 horas, tempo no que a Alameda se converterá nun punto de encontro para dar a benvida simbolicamente ao novo ano. Haberá ambiente musical e distintos momentos para levantar a copa e brindar en conxunto polo ano que remata e polos desexos para o que comeza.
Pensando nos nenos e nenas, o programa inclúe ás 17.00 horas as 'Primeiras campanadas infantís', un adianto lúdico das tradicionais badaladas de fin de ano que permitirá aos máis pequenos vivir a súa propia conta atrás sen ter que agardar á medianoite. As familias están convidadas a participar nesta actividade e a compartir o espírito festivo da xornada.
Desde o Concello de Ordes fan un chamamento a non perder esta cita e lembran que se trata da última festa do ano no municipio, concebida para desfrutar en convivencia e pechar o calendario con bo ambiente na Alameda.