Ordes ofrece hoxe, 26 de decembro, ‘Superheroe’, unha comedia con maxia de Fran Rei dentro do Nadal 2025
A programación de Nadal do Concello de Ordes continúa este venres 26 de decembro coa proposta ‘Superheroe’, de Artefeito Produccións, un espectáculo que combina comedia e maxia e que terá como protagonista a Fran Rei, un nome habitual nos escenarios do municipio. A función comezará ás 18.00 horas na Casa da Cultura, no auditorio María del Carmen Regueira Amor.
A obra xira arredor dun ‘superheroe’ que debe enfrontarse a ameazas e misións imposibles mentres tenta conciliar a vida familiar, entre merendas, lavadoras e cueiros, nun formato que mestura narración oral, humor e maxia.
A cita de hoxe encaixa nun calendario de Nadal que se estende do 22 de decembro ao 5 de xaneiro e que, en boa parte, ten como epicentro a Casa da Cultura. O programa arrancou o domingo 22 cunha gran festa infantil no pavillón Campomaior desde as 17.00 horas, con inchables, xogos e animación. O luns 23, tamén ás 18.00 horas, foi a quenda de ‘O Apalpador e as palabras perdidas’, un espectáculo que combina teatro, monicreques e recursos escénicos como hologramas. E o mércores 24, Papá Noel realizou o seu percorrido habitual polas rúas da vila.
De cara aos vindeiros días, a folla de ruta cultural continúa este sábado 27 ás 20.00 horas co Concerto de Nadal da Banda de Música de Ordes. O luns 29 ás 18.00 horas chegará ‘O poder de Amabel’, de Pérez & Fernández, e o martes 30 ás 18.00 horas a maxia volverá ser protagonista coa actuación de Joshua Kenneth.
O deporte tamén terá un espazo propio o 31 de decembro coa San Silvestre, con saída ás 12.00 horas desde a rúa Entre Parques. Ese mesmo día, a alameda acollerá unha festa de fin de ano entre as 13.00 e as 19.00 horas, con actuacións de Los Alcántara e Disco CDC e DJ Rafa Astray como convidado. Ás 17.00 horas celebraranse as badaladas infantís e haberá callos para as persoas asistentes.
Xa en xaneiro, o venres 2 ás 18.00 horas representarase ‘Iriña Bailarina’, de Teatro Ghazafelhos, e o programa pecharase o 5 de xaneiro coa cabalgata dos Reis Magos polas principais rúas de Ordes.
O Concello sinala que esta programación conta coa colaboración de AECOR Ordes, a Deputación da Coruña, o Instituto para la Transición Justa, Ciudad de la Energía e Dinamizart.