Ordes lanza un curso gratuíto de Atención Sociosanitaria con certificado oficial
O Concello de Ordes, a través do seu departamento de Emprego, vén de convocar un novo curso gratuíto de Atención Sociosanitaria a Persoas Dependentes en Institucións Sociais, dirixido principalmente a persoas desempregadas. Esta iniciativa ten como obxectivo ofrecer unha formación completa e de calidade, permitindo ás persoas participantes acceder a un certificado de profesionalidade de nivel 2, recoñecido en todo o territorio nacional e que pode abrir portas no ámbito laboral.
O curso terá unha duración total de 528 horas e impartirase nas instalacións homologadas do Mercado Agrario Comarcal, no Mesón do Vento. Está previsto que comece o día 1 de decembro de 2025 e contará cun máximo de 15 alumnos/as, para garantir unha atención personalizada e un seguimento óptimo do proceso formativo. As sesións inclúen formación teórica e práctica, permitindo ás persoas participantes adquirir as competencias necesarias para traballar en residencias, centros de día e outras institucións sociais que atendan a persoas dependentes.
As persoas interesadas en participar deberán formalizar a súa inscrición a través do portal de emprego da Xunta de Galicia ou directamente nas oficinas do Servizo Público de Emprego de Galicia. Para calquera dúbida ou consulta, pódese chamar ao teléfono 981 68 00 02 (extensión 6).
Con este novo curso, o Concello de Ordes continúa reforzando a súa aposta pola formación profesional e a inserción laboral, poñendo á disposición da cidadanía ferramentas que combinen aprendizaxe e empregabilidade nun sector de crecente demanda e relevancia social.