Ordes inaugura o primeiro parque de calistenia accesible de España para persoas con mobilidade reducida
O Concello de Ordes estreará o sábado 22 de novembro o que será o primeiro parque de calistenia de España accesible para persoas con mobilidade reducida e, ao mesmo tempo, a pista municipal de OCR (Obstacle Course Racing) máis longa do país, cun percorrido de máis de 11 metros. A inauguración terá lugar ás 12.30 horas na rúa Manuel Murguía, nun acto no que participará o alcalde, José Luis Martínez Sanjurjo.
Á cita acudirá tamén Marcos Vázquez, escritor e comunicador de referencia no ámbito da saúde e do deporte, autor de seis libros sobre hábitos saudables e creador de Radio Fitness Revolucionario, un dos podcasts máis seguidos neste eido. Vázquez será o encargado de conducir unha sesión de adestramento aberta ao público asistente.
O novo espazo foi deseñado e construído pola empresa local Xtenos, con sede en Ordes, que desenvolveu un parque modular que integra nunha mesma instalación os exercicios de calistenia e o adestramento OCR. Trátase dun equipamento versátil e ampliable, pensado para evolucionar co tempo mediante a incorporación de novos módulos e accesorios, e para funcionar como punto de encontro veciñal arredor da actividade física, a saúde e a inclusión.
Na zona de calistenia, o parque conta con barras de muro para traballos de mobilidade e forza, barras de flexións e paralelas a diferentes alturas adaptadas a todo tipo de usuarios, unha presa inclinada para exercicios de empuxe e abdominais e un dip bench para o fortalecemento do tren superior. Pola súa banda, a área OCR incorpora o percorrido municipal con obstáculos máis longo de España, unha escada horizontal de altura variable que pasa de 1,6 a 2,8 metros e diversas estruturas pensadas para adestramentos intensos e simulacións de competición.
Con esta infraestrutura, Ordes convértese no primeiro concello galego en dispoñer dunha OCR pública con obstáculos e dun circuíto de calistenia accesible, reforzando o seu compromiso coa promoción da actividade física e dun estilo de vida activo nun entorno seguro e de alta calidade. A instalación está concibida para ser utilizada por toda a comunidade, incluídas as persoas con mobilidade reducida.