Ordes entra na Zona de Especial Risco pola gripe aviaria e activa restricións para a cría de aves
O Concello de Ordes informou de que o municipio está integrado na Zona de Especial Risco (ZER) fronte á influenza aviaria. Ordes é un dos tres concellos da provincia da Coruña clasificados como ZER, xunto con Cerceda e Tordoia, dentro do paquete de 40 municipios galegos afectados polas novas prevencións acordadas polas autoridades sanitarias. As limitacións entraron en vigor o 10 de novembro.
Entre as obrigas principais figuran o confinamento das aves de curral, polo que queda prohibida a cría ao aire libre salvo que se garantan barreiras físicas que eviten o contacto con aves silvestres e a subministración de auga e alimento baixo cuberta; a separación de patos e gansos doutras especies, a protección dos depósitos de auga e a prohibición de mercados, feiras ou calquera concentración de aves salvo autorización expresa tras avaliación de risco. Tamén se insta a reforzar a bioseguridade nas granxas e currais, co control de visitas e a limpeza de calzado e útiles.
As medidas aplícanse tanto ás explotacións industriais, artesanais ou pequenas como aos currais de autoconsumo. A activación realizouse a nivel estatal pola situación epidemiolóxica en Europa e España, e recóllese na normativa de referencia en materia de influenza aviaria.
O Concello lembra que, ante calquera mortalidade anormal, baixa de posta ou síntomas compatibles coa enfermidade, débese avisar de inmediato aos servizos veterinarios oficiais.