Ordes e Cerceda abren unha ventá de negocio na Vía Verde con encontros sobre turismo e economía circular
A comarca de Ordes acollerá nas vindeiras semanas dous Encontros sobre Turismo e Economía Circular pensados para poñer o foco nas oportunidades que pode xerar a Vía Verde Compostela-Tambre-Lengüelle no ámbito local. As sesións celebraranse o 23 de febreiro en Ordes, no Museo do Traxe, e o 2 de marzo en Cerceda, no viveiro empresarial, ambas en horario de 17.00 a 20.00 h.
A primeira cita, en Ordes, centrarase no emprendemento turístico sostible e nas posibilidades económicas que abre a Vía Verde para a zona. O programa arrancará ás 17.00 h cun relatorio sobre economía circular como ferramenta para reforzar o turismo e a gastronomía local. Despois abrirase unha quenda de preguntas e, a partir das 18.00 h, desenvolverase unha rolda de experiencias con proxectos que xa traballan nesa liña, como Casa Grande de Xanceda, Cabañitas del Bosque e Galiwonders. No tramo final, a organización prevé un espazo de intercambio entre asistentes e unha rolda de petiscos para favorecer o contacto entre axentes do territorio.
O encontro do 2 de marzo en Cerceda xirará arredor da economía circular aplicada á gastronomía, ao consumo de proximidade e á posta en valor do produto local. Tras a benvida ás 17.00 h, haberá un relatorio centrado nunha gastronomía con impacto local vinculada á Vía Verde e presentarase tamén o proxecto agroalimentario Horta da Lousa. A partir das 18.15 h está programado un showcooking da man de Gastrolab Arousa, coa participación de Miguel Mosteiro, e o peche da xornada prevese arredor das 19.30 h cunha degustación de tapas.
As sesións pretenden servir de punto de encontro para persoas emprendedoras, empresas e colectivos interesados en ligar turismo, produto local e sustentabilidade, tomando a Vía Verde como fío condutor para xerar actividade económica no rural. Para máis información e inscricións, o Concello indica que se pode consultar a canle habilitada na cartelería do evento.