Oleiros será o escenario da fase final de ascenso á 1ª División Masculina de voleibol
O municipio de Oleiros converterase esta fin de semana no epicentro do voleibol estatal coa celebración da Fase Final de Ascenso á 1ª División Masculina, organizada polo Club Voleibol Oleiros en colaboración co Concello. O evento deportivo desenvolverase do venres 23 ao domingo 25 de maio e reunirá seis dos mellores equipos da categoría en tres instalacións municipais: os polideportivos de Valle Inclán (Perillo), A Rabadeira (Oleiros) e Canide (Mera).
A presentación oficial tivo lugar no Auditorio da Fábrica, cun acto no que participaron a concelleira de Deportes, Teresa Vázquez Maseda; a tesoureira do CV Oleiros, Mar Bustabad; o adestrador do equipo sénior masculino, Luis Cuadrado; o capitán Rubén Martínez e varios xogadores da plantilla.
Durante o acto, a concelleira destacou a relevancia que ten para o municipio albergar un evento deportivo desta magnitude. “É un grande orgullo para Oleiros poder contar cun equipo que chega a esta fase final e representar ao noso deporte a nivel estatal”, afirmou Vázquez Maseda, quen aproveitou para transmitir os seus mellores desexos ao equipo local nesta recta final da tempada.
Pola súa banda, o técnico Luis Cuadrado puxo en valor o esforzo do equipo, lembrando que boa parte do plantel está composto por xogadores en idade xuvenil. “É un tremendo orgullo poder disputar esta fase na casa. Xogar diante da nosa xente é unha motivación engadida, e confío plenamente nos rapaces para facer un gran papel”, subliñou.
O capitán Rubén Martínez tamén se amosou ilusionado coa oportunidade e incidiu no impacto que podería ter un ascenso para o club: “Sería unha experiencia espectacular e un impulso enorme para a nosa canteira. Poderiamos ser un referente para moitos xogadores da comarca”.
Ademais do CV Oleiros, a fase final contará coa participación do Club Vigo Voleibol (Galicia), o Jatorkide Boleibol Kirol Kluba (País Vasco), o Vóley Playa Cartes (Cantabria), o CV Burgos (Castela e León) e o CID Jovellanos (Asturias). A competición dividirase en dous grupos de tres equipos cada un. Os dous primeiros clasificados de cada grupo accederán ás semifinais, das que sairán os dous equipos que loitarán polo ascenso na gran final do domingo 25, ás 11.30 horas, no Polideportivo de Valle Inclán.
Oleiros prepárase así para vivir unha fin de semana de emoción e deporte ao máis alto nivel, cun equipo local disposto a dar o mellor de si para acadar un soñado ascenso á Primeira División Nacional.