Oleiros logra unha distancia única de 12 metros para novas construcións ao longo da N-VI
O Concello de Oleiros vén de lograr un importante acordo co Ministerio de Transportes para que a separación das novas edificacións respecto á estrada N-VI, ao seu paso pola Avenida das Mariñas, sexa de 12 metros en todo o seu percorrido. Esta medida pon fin á arbitrariedade que viña aplicándose ata agora, con distancias que en certos puntos chegaban ata os 50 metros, dificultando a construción en numerosos solares.
Este avance é froito das xestións do alcalde e das reunións mantidas entre o persoal técnico municipal e a Demarcación de Estradas. O Ministerio comprometeuse a realizar nun prazo de seis meses un estudo detallado para establecer os 12 metros como referencia en todo o trazado. Segundo informou o Concello, o 80 % da superficie afectada está clasificada como solo urbano.
A Dirección de Estradas do Estado xa avalara esta distancia cando se tramitou a aprobación do Plan Xeral de Ordenación Municipal de Oleiros. Porén, a normativa estatal vixente impedía aplicar a medida a zonas como Iñás e O Carballo, o que na práctica bloqueaba o desenvolvemento urbanístico de moitos terreos. “Nas avenidas urbanas non son necesarias distancias de 50 metros ata os edificios”, lembran desde o goberno local.
A Avenida das Mariñas, aínda que pertence á rede estatal, é na realidade unha vía urbana e principal eixo de comunicación da área metropolitana da Coruña. Nas últimas décadas realizáronse diversas intervencións para mellorar a mobilidade de proximidade, reducir a velocidade a 50 km/h e favorecer o tránsito peonil entre ambas marxes.
O futuro da vía, segundo o Concello, pasa por transformarse nunha gran avenida urbana unha vez estea finalizada a vía Ártabra e se complete o desvío entre O Seixal e o acceso á autoestrada, infraestrutura que poderá absorber boa parte do tráfico actual.
Paralelamente, o Concello tamén leva impulsado alternativas de mobilidade máis sostibles. Entre elas, destacan os paseos marítimos e a recente entrada en servizo do vial ciclopeonil do Rego de San Pedro, que conecta O Seixal con Iñás ao longo de 4 quilómetros, permitindo desprazamentos seguros a pé ou en bicicleta por todo o sur do municipio.