Oleiros lanza cintas métricas co lema “A distancia márcoa eu” para previr agresións en festas
O Concello de Oleiros reforzará a súa aposta pola seguridade e o respecto durante as festas de San Antón en Dexo coa instalación de Puntos Violeta nas noites do venres 13 e sábado 14 de xuño, en horario de 23.00 a 03-00 horas. Esta medida busca previr e actuar fronte ás violencias sexuais, LGTBIfóbicas e outras formas de violencia machista que poidan xurdir durante o ocio nocturno.
Como novidade nesta edición, repartiranse cintas métricas co lema “A distancia márcoa eu”, un recurso simbólico e visual co que se pretende lembrar que o respecto aos límites persoais é esencial para garantir festas seguras, libres de agresións e baseadas no consentimento. A iniciativa enmárcase dentro da campaña municipal “Non faltes á festa, pero de festa non faltes”, que busca sensibilizar á veciñanza e dotar de ferramentas para a detección e resposta fronte ás violencias nos espazos de lecer.
Os Puntos Violeta estarán atendidos por profesionais especializados, encargados de ofrecer apoio, atención psicolóxica e acompañamento en caso de que se produza algún tipo de agresión. Contan cun protocolo de actuación específico que se activa en coordinación directa coas forzas de seguridade e os servizos sanitarios. Ademais da atención directa, estes espazos tamén terán funcións de sensibilización, facilitando materiais informativos e divulgativos adaptados a todas as idades, así como información sobre os recursos municipais dispoñibles en materia de igualdade.
Con esta acción, o Concello de Oleiros reafirma o seu compromiso por seguir traballando activamente pola erradicación das violencias machistas e pola creación de contornos festivos seguros, inclusivos e libres de discriminación.