Eventos

A quinta feira reuniu 34 entidades e mobilizou pola mañá arredor de 600 estudantes dos catro institutos do municipio, antes de abrir pola tarde ao público xeral no Pavillón Arsenio Iglesias de Santa Cruz

A V Feira de Orientación Académica e Profesional de Oleiros pechou este mércores unha xornada de alta afluencia e intensa actividade informativa, cun formato pensado para acompañar ao alumnado na decisión do seu itinerario formativo e das súas posibles saídas laborais.

Ao longo do día, un total de 34 entidades deron a coñecer a súa oferta en postos de atención continuada, con presenza de universidades, centros de FP e escolas públicas e privadas de ámbitos moi diversos (hostalaría, finanzas, formación de pilotos e azafatas, imaxe e son, artes gráficas, deseño), ademais de academias de oposicións, Forzas Armadas e residencias universitarias.

A franxa da mañá, entre as 9.30 e as 13.30 horas, estivo reservada de maneira exclusiva para o alumnado dos catro centros de ensinanza secundaria de Oleiros, que asistiu en distintas quendas acompañado por profesorado e orientación. Pola tarde, o encontro abriu as portas a todas as persoas interesadas, ampliando o foco cara ás familias e ao público xeral.

A iniciativa estivo organizada polo Concello de Oleiros coa colaboración dos departamentos de orientación do IES Neira Vilas, IES María Casares, IES Miraflores e o colexio Hijas de Cristo Rey, nun traballo conxunto que busca reforzar a información e o acompañamento nun momento clave para a toma de decisións do estudantado.