Oleiros denuncia actos vandálicos no paseo de Mera e no paseo fluvial entre Nós e Iñás
Nos últimos días, o Concello de Oleiros vén de denunciar varios actos vandálicos que causaron importantes danos en espazos públicos do municipio. No final do paseo de Mera, xunto á casa dos Miranda, foi arrancado e destruído un banco, ademais de producirse a rotura dunha papeleira. Paralelamente, na área recreativa do paseo fluvial que une Nós e Iñás, as casetas dos servizos públicos apareceron pintadas, o que deteriorou gravemente este novo espazo comunitario.
Desde o Concello fan un chamamento directo á mocidade, principal usuaria destas zonas, para que coiden e respecten os espazos públicos que se ponen a disposición da veciñanza. “É imprescindible desfrutar destes lugares sen deterioralos, pois estes actos supoñen un custo económico para toda a veciñanza”, advirten.
O Goberno local manifesta o seu rexeitamento a “calquera forma de violencia contra o patrimonio municipal” e fai un apelo á responsabilidade colectiva para “manter o municipio en bo estado e garantir entornos seguros, limpos e accesibles para todas as persoas”. A defensa e conservación dos espazos públicos, sosteñen, é un compromiso que afecta a toda a comunidade.