Oleiros convoca unha andaina solidaria este domingo para apoiar ‘a nena de Oleiros’
Oleiros acollerá este domingo 28 de decembro unha andaina solidaria ‘pola nena de Oleiros’, unha iniciativa impulsada por varias entidades veciñais do municipio coa colaboración do Concello. A convocatoria busca reunir veciñanza e visitantes nunha actividade aberta e familiar, na que o recadado se destinará a fins solidarios.
A saída está prevista ás 12.00 horas dende o Parque da Nirvana, cun itinerario ata o Parque das Trece Rosas e regreso ao punto de inicio (ida e volta). Para facilitar a participación, as inscricións poderán tramitarse a través das entidades organizadoras ou o propio día do evento no Parque da Nirvana, a partir das 11.00 horas.
A organización establece un prezo popular por dorsal: 3 euros para persoas adultas e 2 euros para nenos e nenas. Ademais, os dorsais poderán recollerse nos locais sociais das entidades organizadoras desde o 15 de decembro e tamén o mesmo día da andaina.
A marcha está promovida polas asociacións veciñais Santaia (Santa Cruz), A Ría (Perillo), Os Rueiros, San Antón e San Cosme de Maianca, entre outras, e conta tamén coa colaboración da Fundación Martín Álvarez Muelas e do Concello de Oleiros. Coa iniciativa, as entidades chaman á participación para sumar pasos ‘por unha boa causa’ e despedir a fin de semana cun plan ao aire libre.