Infraestructuras

O Concello incorpora ao dominio municipal 61 parcelas (29.631 metros cadrados) por 270.000 euros para abrir un novo tramo litoral de 2,5 quilómetros, cunha obra prevista de máis dun millón de euros este 2026.

O Concello de Oleiros xa é propietario da totalidade dos terreos necesarios na franxa costeira comprendida entre a praia de Naval e Canide para impulsar a construción dunha nova senda litoral ao longo deste ano. Segundo informou o goberno local, a administración tomou posesión de 29.631 metros cadrados repartidos en 61 parcelas, todas elas clasificadas como solo rústico, pola adquisición das cales abonou un total de 270.000 euros.

O proxecto prevé un paseo de 2,5 quilómetros que permitirá abrir á cidadanía un tramo de costa que ata o de agora permanecía en mans privadas. As obras, cun orzamento superior a 1 millón de euros, están previstas para iniciarse este mesmo ano.

Coa nova infraestrutura, o Concello busca crear un itinerario alternativo de carácter ciclopeonil entre Mera e Santa Cruz, seguindo o litoral de Dorneda. O obxectivo, segundo o executivo municipal, é avanzar cara a unha costa plenamente transitable a través de terreos públicos.

O alcalde, Ángel García Seoane, salientou o valor paisaxístico do ámbito e apuntou que a actuación dará continuidade aos tramos xa existentes cara Mera e cara Santa Cruz, incorporando un novo paseo ‘cunha paisaxe fermosísima’ que se executará integramente con medios municipais.