Oleiros celebrará a súa Festa de Entroido o 7 de marzo cun concurso de disfraces
O Concello de Oleiros organizará a tradicional festa de Entroido o venres 7 de marzo no pavillón Arsenio Iglesias en Santa Cruz, coa orquestra Os Satélites e un popular concurso de disfraces no que se repartirán 5.200 euros en premios. A festa comezará á media tarde e está pensada para todos os públicos.
O concurso de disfraces contará con dúas categorías: individuais-parellas e grupos. Na categoría de grupos premiaranse os mellores disfraces con diversos premios, destacando un primeiro premio de 1.500 euros, un segundo de 1.000 euros, dous terceiros de 500 euros e un accésit de 400 euros. Pola súa banda, na categoría individual-parellas, os premios serán tamén en metálico, destacando un primeiro premio de 400 euros, un segundo de 300 euros e varios accésit e terceiros premios con cantidades que oscilan entre os 100 e 200 euros.
O prazo de inscrición estará aberto ata o 5 de marzo ás 14.00 horas. Para participar no concurso, as persoas interesadas deberán presentar as súas solicitudes a través da Sede Electrónica Municipal ou de forma presencial no Centro Cultural A Fábrica de Perillo.
A festa promete ser unha xornada chea de diversión, cor e creatividade, converténdose nunha das citas máis agardadas do Entroido en Oleiros.