Oleiros asina un convenio coas ANPAS para axilizar o pago das axudas ao comedor escolar
O Concello de Oleiros deu un novo paso para reforzar o apoio ás familias con fillos e fillas en idade escolar coa sinatura dun convenio coas ANPAS do municipio, co obxectivo de facilitar e axilizar o pagamento das subvencións para os comedores escolares.
A concelleira de Servizos Sociais e Igualdade, Belén Taboada, foi a encargada de formalizar o acordo, que permitirá que sexan as propias asociacións de nais e pais as que asuman as xestións administrativas vinculadas ao cobro das axudas. Deste xeito, simplifícanse os trámites para as familias beneficiarias, que deben solicitar individualmente a subvención.
As axudas municipais ao comedor escolar cobren diferentes porcentaxes segundo a situación económica familiar, e poden chegar ata o 100 %, pasando polo 60 % ou o 40 % do custo total. O prazo para solicitar esta prestación permanece aberto ata o 30 de xuño.
O Concello quixo agradecer publicamente a colaboración das ANPAS, destacando “a súa dedicación para facilitar os trámites que conleva esta medida de apoio ás economías familiares e por todo canto fan polo benestar dos nenos e nenas de Oleiros”.
Con este convenio, Oleiros continúa a reforzar as políticas de conciliación e igualdade, apostando por medidas que reduzan a carga económica das familias e garantan o acceso dos menores a un servizo esencial como é o comedor escolar.