Oleiros anuncia que o proxecto de conexión da Vía Ártabra coa AP-9 sairá a exposición pública este ano
O proxecto de conexión da Vía Ártabra coa autoestrada AP-9 entrará en exposición pública ao longo deste ano, segundo anunciou o Concello de Oleiros. Esta fase era unha demanda reiterada do goberno municipal, que leva anos reclamando avances nesta infraestrutura estratéxica para a comarca. Superado este trámite, a Xunta poderá licitar as obras no ano 2026.
No pasado mes de xuño, o Pleno do Concello de Oleiros aprobou, a proposta do Goberno local de Alternativa dos Veciños, instar á Xunta de Galicia a “realización con urxencia de todos os trámites necesarios de forma correcta para a contratación da obra da Vía Ártabra entre Iñás e A Gándara para a súa conexión coa AP-9”. A moción saíu adiante a pesar do voto en contra do PSOE e do BNG.
Ademais, o Concello tamén reclamou á administración autonómica que, unha vez aprobado o proxecto de conexión coa AP-9, se inicie a redacción do trazado que permitirá prolongar a vía ata a autovía A-6. Esta continuidade garantiría a funcionalidade completa dunha infraestrutura pensada para aliviar a presión sobre as principais vías da área metropolitana.
Desde o Goberno local lembran que a comarca da Coruña sofre un "importante déficit de infraestruturas viarias, así como de medios de transporte público axustados ás necesidades reais de mobilidade de cidadanía e empresas". Nese contexto, a Vía Ártabra destaca como unha actuación “transversal” que conectará concellos e polígonos industriais de Cambre, Bergondo, Sada, Oleiros, Culleredo, Arteixo e A Coruña, establecendo ligazóns directas coa AP-9, a A-6 e outras estradas principais.
O trazado permitiría tamén reducir de maneira significativa a saturación do tráfico en puntos especialmente problemáticos como a Costa da Tapia en Cambre, a estrada da costa de Sada e Oleiros ou a ponte da Pasaxe.
Desde Oleiros critican os obstáculos que atrasaron a execución desta obra. “A primeira fase da Vía Ártabra, desde o porto de Lorbé ata a AP-9, sería xa neste momento unha realidade de non ser polo anterior Goberno de Cambre que atopou un subterfuxio legal para que a xustiza paralizase a obra por erros administrativos cometidos polo Goberno autonómico bipartito”, denuncian.
Advirten, ademais, que “intereses persoais de representantes políticos de Cambre, mentalidades localistas, cálculos electoralistas ou discursos demagóxicos dalgúns grupos políticos non poden frear durante máis tempo unha infraestrutura supramunicipal clave para o progreso da comarca da Coruña no seu conxunto, máis se cabe co grave problema de mobilidade existente na área metropolitana máis importante de Galicia”.