Política | Educación

O Concello asegura que Educación se comprometeu a reformalo no verán, pero denuncia que meses despois segue ‘impresentable’, con humidades e filtracións polo que o alcalde remitiu unha carta ao conselleiro para reclamar unha actuación urxente

O Concello de Oleiros elevou a súa presión sobre a Xunta de Galicia polo estado do comedor do CEIP Isidro Parga Pondal, en Santa Cruz. O Goberno municipal denuncia que, malia as reclamacións reiteradas e as peticións da ANPA, a Consellería de Educación comprometérase a executar unha reforma durante o pasado verán e, a día de hoxe, non se coñecen avances nin prazos concretos para a obra.

Segundo o Concello, o espazo no que come o alumnado presenta un deterioro severo, con paredes danadas, humidades e filtracións de auga, unha situación que considera incompatible cun centro público e que require ‘urxencia’ por parte da Administración autonómica.

O alcalde, Ángel García Seoane, dirixiuse por escrito ao conselleiro de Educación para informalo do estado das instalacións e reclamar que se acometan de inmediato os traballos pendentes. Desde o executivo local lembran que a competencia en materia educativa corresponde á Xunta e que aos concellos lles compete unicamente o mantemento menor, polo que atribúen á Administración autonómica a responsabilidade principal desta intervención.

A denuncia sobre o comedor chega, ademais, despois doutras queixas municipais sobre o colexio. En decembro, Oleiros xa advertira de mobiliario ‘obsoleto e deteriorado’ nalgunhas aulas e anunciou a apertura dun expediente á concesionaria da limpeza por deficiencias detectadas, especialmente en Infantil. O Concello subliña que, para garantir condicións dignas, asumiu con fondos propios actuacións que considera alleas ás súas obrigas, como a renovación recente do solo nas aulas de Infantil e melloras nas instalacións deportivas do centro.