Oleiros acomete novas melloras nas beirarrúas de Icaria cun investimento de máis de 160.000 euros
O Concello de Oleiros porá en marcha esta semana unha nova fase de renovación das beirarrúas en Icaria, concretamente nas rúas Ícaro, Pegaso e Sendeiro, situadas na parroquia de Montrove. A intervención suporá un investimento de 167.040,49 euros e dará continuidade ás actuacións de mellora que se están levando a cabo nesta zona do municipio.
O obxectivo principal é garantir unha maior seguridade e accesibilidade para as persoas que se desprazan a pé, especialmente nunha área na que se concentra un notable tecido empresarial. As obras centraranse nos treitos que presentan un peor estado de conservación, con lousas soltas ou elevadas que dificultan o paso e poden provocar caídas.
Os traballos comezarán este luns e terán unha duración estimada de dous meses. Dende o Concello sinalan que estas actuacións forman parte dun plan máis amplo para mellorar o espazo público e adaptar as infraestruturas ás necesidades actuais da veciñanza.