O Ximnasia Oleiros brilla en Grecia cunha prata internacional e destacada participación na Copa do Mundo
O club Ximnasia Oleiros asinou unha actuación memorable en Grecia, onde participou en dúas importantes competicións internacionais con resultados que confirman o seu bo momento deportivo.
O equipo sénior proclamouse subcampión no Campionato de Países Mediterráneos, acadando unha meritoria medalla de prata que consolida o seu prestixio a nivel internacional. Ademais, as séniores lograron situarse no noveno posto da Copa do Mundo, unha das citas máis esixentes do calendario mundial de ximnasia.
Pola súa banda, o equipo júnior tamén destacou no Campionato de Países Mediterráneos, onde finalizou en cuarta posición, quedando ás portas do podio pero demostrando un altísimo nivel competitivo.
Desde o Concello de Oleiros felicitan ás deportistas e ao club polos resultados acadados e pola proxección internacional que están a darlle á ximnasia local. Estes logros supoñen un novo impulso para o deporte de base no municipio e un orgullo para toda a veciñanza.