O transporte de viaxeiros da provincia da Coruña sae á rúa en Santiago o venres 9 de xaneiro
As organizacións sindicais CCOO, CIG e UGT convocaron unha manifestación para este venres, 9 de xaneiro, en Santiago de Compostela para reclamar un novo convenio colectivo no transporte de viaxeiros da provincia da Coruña. A mobilización arrancará ás 11.00 horas na estación intermodal e finalizará diante do Parlamento de Galicia.
A protesta enmárcase nunha nova quenda de paros durante este mes, despois dos xa realizados en decembro. Segundo explican os sindicatos, o persoal aprobou en asembleas celebradas a semana pasada volver parar a actividade os días 12, 13, 16, 19, 20 e 23 de xaneiro. Ademais, advirten de que, se a patronal mantén a súa postura, desde o 2 de febreiro convocarán folga indefinida.
O detonante das mobilizacións é o bloqueo da negociación do convenio, que, segundo denuncia CCOO, leva catro anos paralizado e quedou desfasado. O comité de folga apunta á situación salarial como un dos puntos máis conflitivos e lembra que no ano 2024 non se aplicou ningunha suba.
As centrais aseguran que a comisión negociadora atopou dificultades para avanzar e sinalan que a proposta máis relevante presentada pola patronal foi un incremento do 1,20 % nos salarios e 'nada' no relativo á xornada. Esa oferta foi rexeitada por considerala insuficiente e por non abordar as condicións de tempo de traballo.
Entre as principais reclamacións do sector figuran unha suba salarial 'digna', a redución de xornada e unha mellor ordenación do tempo de traballo, así como a actualización de permisos retribuídos e días de asuntos propios para adaptalos ao Estatuto das persoas traballadoras. Tamén reclaman recoñecer o transporte discrecional como actividade de servizo público, avanzar na xubilación parcial e regular a xornada do persoal acompañante.
O comité de folga insiste en que os paros son, ao seu xuízo, a vía para 'desbloquear as negociacións' e para recuperar un convenio colectivo que, denuncian, a patronal pretende deixar esmorecer.