O temporal deixa caídas de árbores e desprendementos en Betanzos, con cortes puntuais de estrada
O episodio de mal tempo das últimas horas obrigou a intervir aos servizos de emerxencia en Betanzos por diversas incidencias asociadas ao vento e á chuvia. Segundo informou o Concello, rexistráronse caídas de árbores en puntos como Xanrozo, Guiliade, Gas e A Piadela, o que levou a realizar cortes puntuais de estrada para garantir a seguridade e permitir os traballos de retirada.
Ademais, producíronse novas caídas de árbores e desprendementos de terra nas proximidades de centros educativos e na zona do Cepiño. O Concello sinala que, a esta hora, os contratempos quedaron solucionados, aínda que recomenda extremar a prudencia en desprazamentos, especialmente en vías secundarias e áreas arboradas.
O temporal enmárcase na borrasca ‘Joseph’, que deixou en Galicia centos de incidencias (moitas delas por árbores e ramas en estradas e por pequenos desprendementos), con A Coruña entre as provincias máis afectadas no balance de avisos atendidos. Aínda que o pico de intensidade xa pasou, ao longo da semana espéranse novos frontes con tempo inestable e frío.