O Teatro Colón albergará a IV Gala da Cultura da Deputación o 10 de abril
O Teatro Colón será o escenario, o próximo 10 de abril ás 19.00 horas, da IV Gala da Cultura da Deputación da Coruña. O evento premiará a excelencia cultural galega a través da entrega dos galardóns convocados pola área de cultura da Deputación no 2024, entre os que destacan o Torrente Ballester de Narrativa, o Castelao de Banda Deseñada, o Raíña Lupa de Literatura Infantil e Xuvenil e o Fran Pérez ‘Narf’ de Música, entre outros. A entrada é libre ata completar aforo.
A gala, presentada pola xornalista Susana Pedreira, terá como fío condutor a reinterpretación da tradición ou “o novo tradi”. Contará ademais coas actuacións de Alana e Fran Sieira e disporá de interpretación en lingua de signos. O encaixe de Camariñas, símbolo da tradición e identidade galega, estará presente en toda a estética do evento.
A deputada Natividade González destacou que a gala busca premiar o talento galego e reivindicar a cultura como elemento de identidade e transformación social. Como parte desta aposta, a Mostra do Encaixe de Camariñas participará activamente, con palilleiras traballando en directo nas inmediacións do Teatro antes do comezo do evento. Ademais, o deseñador Jose Matteos será o responsable do vestiario da presentadora, mentres que “La Mapache” vestirá a Alana cun deseño inspirado no traxe tradicional galego.
A cineasta Nela Fraga aportará unha peza audiovisual baseada en imaxes do Arquivo do Patrimonio Oral da Identidade do Museo do Pobo Galego, e os premios que se entreguen serán obra da escultora Soledad Penalta.
A directora artística da gala, Thais Suárez, explicou que o evento renderá homenaxe aos creadores e creadoras galegas, revitalizando o patrimonio cultural cunha mirada contemporánea. No escenario, o encaixe de Camariñas transformarase en escultura, creando unha instalación que dialogará coa peza audiovisual de Nela Fraga.
Pola súa banda, Susana Pedreira manifestou a súa satisfacción por conducir unha gala que celebra e visibiliza a cultura galega. Destacou que a cita será unha "celebración colectiva" onde se reivindicará o traballo dos creadores do presente e do pasado a través da música, a palabra e a emoción.
O grupo Alana e o bailarín Fran Sieira serán os encargados de poñer ritmo á gala, ofrecendo unha actuación especial e chea de sorpresas. Alana subliñou a importancia de tender pontes entre pasado e presente, algo que consideran clave na aposta da Deputación pola cultura galega e os novos talentos.