O San Xoán da Coruña en cifras: pecha con 152 asistencias e 44 toneladas de lixo recollido
A festa de San Xoán na Coruña pechou cun balance de 152 asistencias, cifra que supón 32 menos que as rexistradas o ano pasado, segundo os datos facilitados por Cruz Vermella e Protección Civil tras o dispositivo especial activado para as celebracións da noite do 23 de xuño.
Durante a xornada, os servizos de emerxencias realizaron 27 mobilizacións de ambulancia, das que sete remataron con altas no propio lugar. Dos 20 traslados ao hospital, nove foron ao centro de referencia, entre os que destaca un caso con pronóstico reservado por unha caída desde altura.
As intervencións máis frecuentes foron por queimaduras, cun total de 44 rexistradas. Ademais, contabilizáronse 33 casos de intoxicacións etílicas e 24 partes relacionados con cefaleas, mareos e outras indisposicións.
En paralelo, os puntos violeta habilitados para o apoio en materia de violencia de xénero informaron a máis de 1.100 persoas (537 mulleres e 593 homes), sen que se producisen denuncias por violencia sexual ou outras violencias machistas durante as festas.
A alcaldesa da Coruña, Inés Rey, que visitou o posto de mando central instalado na zona da Coiraza do Orzán, agradeceu hoxe o labor dos profesionais dos servizos de emerxencia: "O seu traballo é fundamental para asistir e coidar da cidadanía. Máis se cabe, no contexto de eventos multitudinarios como o San Xoán, que segundo os cálculos efectuados onte á noite polas forzas de seguridade congregou a máis de 190.000 persoas nas rúas e as praias".
No total, máis dun milleiro de persoas participaron no dispositivo de seguridade e limpeza deseñado para a festividade. En canto á recollida de residuos, o servizo de limpeza acelerou as tarefas de xeito que ás 10:30 horas desta mañá a praia de Riazor xa estaba limpa e xa había bañistas, mentres que para as 14:00 horas está prevista a limpeza da praia do Orzán, dous horas antes que no San Xoán do ano pasado. En canto ao volume de lixo recollido, nesta edición alcanzáronse as 44 toneladas, 13 menos que en 2024.