O Quiosco Alfonso, en A Coruña, acolle e exposición ‘Seica na Coruña’, antoloxía de Xesús Carballido
O Quiosco Alfonso inaugura a mostra Seica na Coruña, comisariada ao redor da obra do artista Xesús Carballido. O acto de apertura contou coa asistencia do concelleiro de Cultura e Turismo, Gonzalo Castro, quen subliñou a aposta pola programación expositiva de creadores galegos nos espazos municipais.
A exposición reúne arredor de cen obras nas que predominan as colaxes, xunto a ensamblaxes e outros obxectos artísticos. A práctica de Carballido caracterizase polo emprego de pequenos obxectos da vida cotiá —tipos de imprenta, ferro forxado, cunchas, etiquetaxe comercial— que recupera e integra nas pezas para construír novos sentidos. O proceso creativo do autor parte con frecuencia dun elemento fortuíto: un libro, un obxecto atopado, unha imaxe que serve de punto de partida e que logo evoluciona segundo as demandas da propia obra.
A mostra pretende ofrecer unha selección representativa da traxectoria do artista, amosando series de temática variada que mesturan memoria, obxectualidade e intervención plástica. As obras propoñen unha lectura sobre a reciclaxe de afectos e obxectos, conferíndolles unha nova vida e evocando relatos e lembranzas a través da composición equilibrada de materiais aparentemente desbotados.