O PSOE de Oleiros liga o elevado investimento no Multiusos coa suba de impostos e as limitacións no mantemento
A Agrupación Socialista de Oleiros fixo pública a súa preocupación polo impacto que, ao seu xuízo, está a ter o investimento no futuro Multiusos sobre as contas municipais e sobre a prestación dalgúns servizos públicos. Segundo os datos que manexa o PSOE, o proxecto ten consignados para 2025 un total de 8.036.029,72 euros, arredor do 20% do orzamento municipal dese ano e unha parte moi relevante do capítulo de investimentos.
A formación lembra que, no mesmo exercicio, os ingresos previstos pola venda de solo ascenden a 1.954.166,14 euros. A partir destas cifras, os socialistas interpretan que arredor de 6 millóns de euros necesarios para financiar a obra proceden da maior recadación por impostos e taxas municipais, despois de dous anos de subas xustificadas polo goberno local como necesarias para mellorar os servizos.
No comunicado, o PSOE sostén que esta concentración de recursos no Multiusos estaría a limitar a capacidade do Concello para reforzar o mantemento doutros espazos e infraestruturas. Como exemplo, aluden ás incidencia rexistradas nos primeiros temporais deste outono, con ramas de certo tamaño no chan, outras penduradas das árbores e sumidoiros cegados polas follas, situacións que, segundo indican, lles trasladan veciños de diferentes zonas do municipio.
Os socialistas apuntan tamén ás acumulacións de auga en puntos como Bastiagueiro durante episodios de choiva intensa. Ao seu ver, estes encharcamentos poñen de relevo a necesidade de avanzar na rede separativa de pluviais para reducir o efecto das precipitacións e favorecer ao mesmo tempo unha mellor depuración das augas residuais.
No ámbito do espazo público, a agrupación menciona igualmente elementos de madeira deteriorados en paseos e parques. Consideran que a súa substitución de maneira gradual mediante contratos menores incrementa os custos e demora as melloras percibidas pola veciñanza.
Respecto ao Multiusos, o PSOE insiste en que non cuestiona que se lle vaia dar uso, pero si o tamaño e o custo final da actuación. A formación defende que sería posible un equipamento polivalente de menor dimensión económica, que, ao seu entender, tería un impacto máis moderado nas contas municipais e permitiría destinar máis recursos a mantemento e servizos ordinarios.