O PSOE de Oleiros denuncia irregularidades na xestión municipal tras o informe do Consello de Contas
O Grupo Municipal Socialista de Oleiros reaccionou con contundencia ao informe publicado polo Consello de Contas, que pon en evidencia a xestión ineficiente e obsoleta do Concello baixo o goberno de Alternativa. Os socialistas sinalan que estas conclusións non lles sorprenden, xa que dende hai dous anos veñen fiscalizando e denunciando as mesmas irregularidades que agora o organismo público confirma.
O informe, segundo o PSOE, destaca problemas graves como o incumprimento dos límites máximos establecidos para contratos menores, a concentración das adxudicacións en poucas empresas e a falta de motivación adecuada para estes contratos. En particular, apuntan que unha única empresa acumulou case 100 contratos menores que suman preto de 850.000 euros, e que os orzamentos solicitados sempre proveñen das mesmas compañías, o que evidencia un patrón de contratación pouco transparente.
Traslada o grupo socialista que dende o Concello só responderon que todas as adxudicacións son legais, pero esta afirmación foi cuestionada polos tribunais. En xaneiro de 2024, o Tribunal Administrativo de Contratos de Galicia (TACGAL) anulou un contrato de limpeza viaria por valor de 4,5 millóns de euros debido a irregularidades na súa adxudicación. Ademais, non negaron a existencia dos contratos menores adxudicados a esa mesma empresa.
Os socialistas alertan de que estas irregularidades ocorren a diario co diñeiro dos impostos dos veciños de Oleiros e reclaman unha solución clara e eficaz. Por iso, volven a propoñer, tal e como fixeron en 2024, a licitación dun contrato de mantemento xeral que agrupe os traballos de conservación, reparación e mantemento de beirarrúas, camiños e mobiliario urbano. Esta medida, aseguran, permitiría reducir custos, axilizar os prazos e evitar a fragmentación arbitraria de contratos que, segundo denuncian, beneficia “os amigos do alcalde”.
Na súa postura, o Grupo Municipal Socialista insiste na necesidade dunha xestión responsable, transparente e planificada, e ofrece a súa colaboración ao goberno local para levar adiante esta proposta, que cualifican como unha mellora fundamental para a calidade de vida dos veciños.