O PSOE de Oleiros critica a falta de compromiso coas necesidades sanitarias do norte do municipio
O Grupo Municipal Socialista de Oleiros expresou a súa preocupación pola falta de planificación e investimento adecuado para atender as necesidades sanitarias da poboación do norte do concello, que inclúe as parroquias de Dorneda, Mera, Dexo e Lorbé. Nun comunicado, os socialistas criticaron a "alianza perigosa" entre o alcalde Ángel García Seoane e o Partido Popular da Xunta de Galicia, ao optar por unha reforma parcial do Centro de Saúde de Mera en lugar de apostar pola construción dun novo edificio.
Os socialistas consideran que a reforma prevista, cun orzamento inicial de só 78.000 euros, repartidos ademais en dúas fases, é insuficiente para cubrir as necesidades actuais e futuras da poboación da zona, que se atopa en constante crecemento. "Resulta incomprensible que o Concello dedique 14 millóns de euros ao multiusos, mentres que para un servizo esencial como a sanidade só se planifiquen pequenos parches nun edificio xa deteriorado e con espazo limitado", afirmou un portavoz do grupo socialista.
Problemas estruturais e falta de espazo
Na actualidade, o Centro de Saúde de Mera conta con dúas consultas que xa están ao límite da súa capacidade. Un dos cupos está pechado debido á elevada idade da súa poboación asignada, mentres que o outro se atopa ao bordo do colapso. Segundo o PSOE, aínda que se crease un novo cupo e se incorporase outro facultativo, a falta de espazo físico no centro faría imposible atender esta demanda.
"Esta reforma é un parche que hipotecará calquera posibilidade de mellorar a infraestrutura sanitaria no futuro. A situación actual é crítica, e esta decisión só agrava o problema", explican os socialistas. O grupo tamén denuncia que o anuncio da reforma foi difundido polo Concello cun ton de satisfacción, o que consideran unha "falta de compromiso" co sistema público de saúde e unha mostra de ignorancia sobre as necesidades reais da cidadanía.
Malestar entre usuarios e entidades
A decisión tamén xerou malestar en distintos sectores. Os usuarios do centro critican as limitacións do edificio e a falta de espazos adecuados para a atención sanitaria. Ademais, os profesionais sanitarios lamentan que a Consellería de Sanidade manipule datos para presentar unha situación irreal e favorecer decisións políticas que non resolven os problemas estruturais.
Por outra banda, a Confraría de Pescadores, entidade vinculada ao inmoble, mostrou o seu descontento co proxecto, ao considerar que Xunta e Concello están a apropiarse dun edificio que fora cedido de maneira provisional para ofrecer un servizo sanitario esencial.
Unha aposta por un novo modelo
O PSOE de Oleiros insiste na necesidade de construír un novo centro de saúde no norte do concello, cunha capacidade adecuada e espazos que permitan dar resposta á demanda actual e futura. Os socialistas urxen ao goberno municipal e á Xunta a abandonar proxectos "insuficientes e curtopracistas" e a priorizar os investimentos en servizos públicos esenciais como a sanidade.
"Que queda do compromiso do alcalde coa veciñanza de Oleiros? Agora semella máis interesado en formar parte deste tándem co PP, que vai claramente en contra dos intereses sanitarios da poboación", conclúen desde o Grupo Municipal Socialista.