O PSOE de Cambre presenta o seu proxecto de goberno como alternativa
O PSOE de Cambre fixo públicas as principais liñas do seu proxecto de goberno, que se presenta como unha alternativa á situación de bloqueo institucional que, segundo a formación, afecta ao Concello nos últimos anos. A proposta chega nun momento clave, á espera do pleno no que podería asumir o liderado do goberno municipal.
O proxecto destaca por estar baseado na planificación estratéxica, o diálogo co conxunto da corporación municipal e un firme compromiso coa cidadanía. A formación socialista considera prioritario establecer unha nova etapa de estabilidade institucional e mellora na xestión pública.
Entre as primeiras medidas que contempla o PSOE está a licitación urxente dos servizos básicos, que permanecen prorrogados desde hai máis de dúas décadas. A intención é modernizar a administración local e garantir unha prestación de servizos eficaz e sostible.
Tamén se prevé a apertura dun expediente para revisar e organizar as facturas pendentes, co obxectivo de establecer un procedemento de tramitación máis claro e xusto. Ademais, a formación prioriza o pago das subvencións ás asociacións culturais e entidades deportivas de Cambre, co fin de garantir a continuidade do tecido asociativo do municipio.
No ámbito económico, o PSOE revisaría o borrador dos orzamentos municipais para incorporar propostas de todos os grupos, co propósito de acadar un consenso e aprobar as contas canto antes. Outro dos puntos fortes do proxecto é a vontade de aproveitar ao máximo os fondos do Plan de Obras e Servizos (POS), para executar actuacións que melloren as infraestruturas, os espazos públicos e os equipamentos básicos.
O plan inclúe tamén unha reorganización do persoal do Concello. Está prevista a elaboración dunha nova Relación de Postos de Traballo (RPT), consensuada co cadro de persoal, así como a cobertura das prazas vacantes e a posta en marcha das bases dunha carreira profesional para os traballadores municipais.
Como medida de apoio temporal, o PSOE contempla a colaboración con outros municipios para que persoal doutras administracións poida reforzar provisionalmente a área de recursos humanos, especialmente mentres non se cobre a praza de técnico A1 en xestión de persoal, considerada esencial para o bo funcionamento interno.
Con este conxunto de medidas, o PSOE de Cambre presenta un proxecto de goberno que busca transformar a xestión municipal cunha visión de futuro e un compromiso firme co desenvolvemento do concello.