O PSOE de Arteixo reclama unha mellor distribución das subvencións deportivas
O grupo municipal socialista de Arteixo votou a favor das liñas de subvencións por concorrencia para clubs deportivos e das becas a deportistas no pasado pleno de marzo, pero demandou cambios para unha mellor distribución das axudas.
O voceiro socialista, Martín Seco, destacou que “hai que adaptar as bases para que todos os clubs deportivos reciban unha axuda”, sen que haxa entidades que eviten a concorrencia competitiva establecida por lei ao recibir unha subvención nominal.
“No ano 2025 non é aceptable que algúns clubs do noso concello queden sen ningunha axuda por deficiencias na súa solicitude ou que ata tres entidades queden fóra de todas as liñas de financiamento, mentres outros clubs reciben axudas sen máis”, sinalou Seco. O portavoz socialista subliñou que “a lei establece que a subvención nominal debe ser unha excepción e que existen fórmulas para que todas as entidades poidan recibir unha axuda polo magnífico traballo que realizan”. Ademais, engadiu que “a cantidade establecida, 262.000 euros, leva catro anos conxelada e debería actualizarse, xa que os gastos e a cantidade de clubs que concorren a estas axudas aumentaron”.
Por outra banda, os socialistas demandaron no pleno que o Goberno local elimine a subvención nominal de 50.000 euros que o Partido Popular concede a un único deportista “sen ter que demostrar méritos”. Mentres tanto, o resto de deportistas individuais deben optar a unha beca que conta cun orzamento de só 20.000 euros para repartir entre todos os solicitantes.
Seco solicitou en sesión plenaria que “eses 50.000 euros de subvención nominal se sumen aos 20.000 euros da liña de becas para que todos os deportistas poidan ter axuda municipal en igualdade de condicións”. O portavoz socialista lembrou que en 2024 houbo 28 solicitudes para estas becas e 11 deportistas quedaron sen axuda, algúns deles por falla de crédito suficiente para atender todas as solicitudes. “Unha realidade que foi negada polo alcalde no pleno, pero que é unha información pública que se pode contrastar”, concluíu Seco.