O PSOE de Arteixo reclama solucións urxentes para o IES Manuel Murguía e o Servizo de Axuda no Fogar
O Grupo Municipal Socialista de Arteixo presentará no próximo pleno dúas mocións que afectan directamente á vida diaria das familias do municipio: a mellora do IES Manuel Murguía, o instituto con maior número de estudantes da vila, e a protección do Servizo de Axuda no Fogar (SAF), fundamental para moitas persoas dependentes de Arteixo.
No caso do instituto, os socialistas esixen á Xunta que retire de inmediato as bancadas metálicas en estado de ruína que continúan no recinto. Estas estruturas, oxidadas e perigosas, xa provocaron accidentes e mesmo foron utilizadas para acceder ao centro en roubos. “Non teñen ningún uso educativo nin deportivo e supoñen un risco diario para o alumnado”, denuncia o portavoz socialista, Martín Seco. Os socialistas lembran que o IES Manuel Murguía leva máis dunha década con múltiples deficiencias estruturais sen resolver, a pesar das continuas promesas da Consellería.
A segunda moción está dirixida ao reforzo do Servizo de Axuda no Fogar, que atende a persoas dependentes en Arteixo e que sofre unha grande sobrecarga pola falta de planificación da Xunta. O PSOE denuncia que desde 2008 non se elaborou o Plan Estratéxico de Servizos Sociais, a pesar de ser unha obriga legal. Ademais, alertan da precariedade laboral que padecen as traballadoras do SAF, maioritariamente mulleres, e lembran o recente asasinato dunha empregada no Porriño como mostra da falta de protección no sector.
O PSOE de Arteixo propón aplicar o Real Decreto 893/2024 para reforzar a seguridade das profesionais, crear nun prazo de dous meses unha mesa técnica de dependencia, poñer en marcha un Observatorio Galego do Sistema de Dependencia e, finalmente, aprobar o Plan Estratéxico que leva 16 anos pendente.